· 

em Eseli sys liebschte Zmorge

 

 

Es isch scho lang Mitternacht verbii. Z Eseli u der Samichlous loufe müed, u mit emene leere Sack, düre Wald, am Samichlousehüsli zue. Das isch ä bsunderbar schöne Samichlouseabe gsi. So viel Chind hei am Samichlous as Värsli vorgseit oder es Liedli gsunge. Eis Lied louft em Chlous u am Eseli ging no nache. «I-A ja, ja, ja, ja, I- A, I-A, I-A» het dr Samichlous i Bart gsümmelet u z Eseli het drzue gnickt u mit dä Ohre gwagelet.

 

Ändlech sy si wieder dähei. Dr Samichlous zieht dr rot Mantel ab u wott ne grad ufhenke da brummlet öppis luut u düdlech. « Eseli» seit dr Samichlous «es steit nid öppe ä Bär vor dr Tür?» z Eseli schüttlet dr Chopf und gibt em Chlous mit Muul ä fiine stups i Buuch. «Aha» lachet dr Chlous «das isch mi Buuch gsi wo so het brummlet. I merke scho, i ha Hunger u wen ig so uf z Guggerzytli luege, isch di Chlousenacht scho gli verbii u mier zwee chönnte Zmorge ässe!»

«J-A» seit z Eseli.

 

«Oh jemine» seit dr Chlous u luegt itz leere Brotsäckli. «Itz hani doch vor luuter Nüssli , Läbchueche u Manderlini packe ganz vergässe äs Brot z bache. «De gits halt nume Chäs u Milch zum Zmorge.» Dr Chlous geit ache id Vorratsrüümli, für sech as Stückli Chäs ab z houe u z Eseli louft grad inderdrii.

 

 

 

«Ja also so öppis, das hani ganz vergässe» Dr Samichlous dreiht sech zum Eseli um u seit: «I ha ja vorgeschter, er alte Frau Lüthi wo hinder am Waldrand wohnt, z letzte Stückli Chäs u d Trochewurscht bracht! Itz müesse mer üs oppis anders zum Zmorge sueche.» Dr Samichlous luegt über syni Vorrät. «Was chönnte mir nume ässe? Da steit ä grosse Suurchabistopf. «Also Suurchabis zum Zmorge, wääh!» Es schtuderet dr Samichlous völlig. «Was isch süsch no ässbars umewäg? Ä Sack Härdöpfel, äs Stoffseckli voll dürri Bohne, as Glas mit suure Rande! Also i gse nüt wo mi gluschtet» seit dr Samichlous u schüttlet sy Chopf.

 

 

Aber z Eseli het öppis gseh. Mit syre grosse Schnouze stosst z Eseli ä Büchse uf zyte u der hinder chunnt äs Seckli füre. «Was hi mer de da?» fragt dr Samichlous u nimmt das Seckli id Hand. «Ja itz chummi drus» seit dr Chlous. « Das isch es Säckli voll Haberchörndli u das wosch du natürlech hüt zum Zmorge schnouse. Aber was söll ig de ässe?» Z Eseli bruucht no einisch syni Schouze. Da chunnt d Haberflöcklimühli zum vorschiin! «Du bisch aber es schlaus Tier, liebs Eseli, die alti Haberflockequetschi hani ja ganz vergässe! Sofort nimmt dr Samichlous d Quetschi, u drHabersack mit dä Chörndli geit id Chuchi u richtet sech i.

 

Uf das wo itz chunnt, fröit sech z Eseli immer am meischte. We dr Samichlous ir Chuchi steit u afat choche oder bache de isch das für z Eseli wie amene Zouberer bim zoubere zuezluege. De wirblet dr Chlous dür d Chuchi tuet hie ä Schublade uf nimmt da es Iimachglas vom Gstell. Füüret dr Chochhärd ii. rüehrt i Töpf u Pfanne. U plötzlech, ganz fiin fahts plötzlech afa schmöcke wies muess sy im Samichlousehuus. Nach Holz u Rouch, Zimt u Zucker, Änisstärn u Haberchärn.

 

Dr Samichlous het sini Haberquetschi am Tisch befeschtiget u schüttet itz i Trichter s paar Haberchörnli usem Seckli ii.

Mit dr lingge Hand stützt sech dr Chlous am Tisch ab u mit dr Rächte, dreit är a dr grosse Kurbelä. Simsalabim u scho schneits chlini Haberflöckli itz Täller. Das gseht luschtig us. Dr Chlous mues lang draie u immer wieder Chörndli i Trichter fülle, bis es gnue Flöckli gschneit het. Wo im Täller scho ä Bärg us Haberflöcklischnee wachst, isch er fertig.

Da füllt dr Samichlous ä Pfanne mit Milch u Wasser. Äs Stüpfeli Salz ghört o dri. När stellt dr är d Pfanne ufe Holzchochhärd u lahts lah ufchoche. «So u tz tüe mers lah schneie» seit dr Samichlous. U z Eseli luegt zue, wie z ganze Täller voll Haferföckli id Pfanne schneit.

 

«Zumne rächte Haberbrei ghört gwüss ono äs feins Kompott» murmlet dr Chous i läng Bart.

 

Er nimmt Öpfel, Bire, Orange, Dattle, tröchneti Fiige u Wiiberri. Im Chrueg ufem Tisch hets no Moscht. Alles chunnt ine Pfanne. Usem Gwürzgstell nimmt er no Zimetstange u ä Änisstärn. Mit Schwung landet o das, bi de Frücht. Langsam fahts afa plöderle…

…1,2,3…z Eseli bläiht d Nüeschtere uf und äs herrlechts Düftli zieht i sy Nase ii.

 

Am Eseli si Mage faht afa motore wie ne Laschtwage. «Da het öpper Hunger, gäll Eseli» «Ja- Jaa» antwortet z Eseli.

 

«De wie mer gli ässe» Dr Samichlous deckt dr Tisch u zündet d Cherze am Adväntschranz aa. Wo är zum Fenschter us luegt, gseht er scho dr Silberstreife über dä Tanne, wo dr Morge aakündet.

 

Gnüsslech schmauset z Eseli sy Haberbrei mit em Samichlousekompott.

«So nes feins Zmorge hani no nie gässe» denkt z Eseli.

 

O äm Chlous hets gmundet. Mi gsehts sine müede Ouge aa. Mit dr Stoffserviette putzt er di letschte Räschte us sym Bart u seit: «Zyt für z schlafe».

 

Er chratzet d Räschte vom Haberbrei us dr Pfanne u tuet se ines alts Schüsseli. Das Schüssli stellt dr Samichlous vor d Stallstür. «Öppis füre Fux» dä het doch o immer Hunger, so wie du, liebs Eseli!»

 

dezember 2020 fabienne wyttenbach

 

Hie am Samichlous syni Rezäpt. aber pssst es isch streng gheim!

 

                                                                                                                       

 

                                                                                                                             U so gseht ä Haferquetschi us

kontakt

kontakt@wickelwerk.ch

 

 

Fabienne Wyttenbach - Ryter   

Atelierhaus  /  3700 Spiez

033 654 01 48 

fabienne.wyttenbach@wickelwerk.ch 

  

 

Barbara Pfister - Lüthi

Praxis Scheidegg,  Bernstrasse 39 

3360 Herzogenbuchsee   

078 739 33 69 

 barbara.pfister@wickelwerk.ch 

copyright

Fotomaterial dieser Website ist Eigentum von Wickelwerk und darf nicht kopiert und kommerziell genutzt werden. 

 

AGB Verkauf

Wickelwerk stellt Wickelbedarf her. Die Produkte werden von Hand gemacht und können kleine Abweichungen in Form und Material aufweisen. Solche Fehler können nicht als Schäden geltend gemacht werden. Es werden handgefärbte und handgefilzte Stoffe sowie manuell gefärbte Wolle verwendet, die in Farbe, Muster und Stärke abweichen können. Schäden, die infolge fahrlässiger Beschädigungen oder falscher Pflege (nicht gemäss Pflege-Anleitung) entstanden sind, können nicht als Garantiefall behandelt werden.